केव्हा तरी पहाटे, उष:काल होता होता, मी मज हरपून बसले गं, मलमली तारुण्य माझे, तरुण आहे रात्र अजूनी... या सर्व गाण्यांमध्ये साम्य काय? शब्दांची दैवी देणगी लाभलेले गझलकार सुरेश भट यांचे शब्द आणि दैवी स्वरांचं लेणं लाभलेल्या आशा भोसले यांचा मधाळ स्वर यांच्या अद्वैतातून जन्मलेली ही गाणी मराठी संस्कृतीचा चिरकाल ठेवा आहेत. ‘सांग ह्या कोजागिरीच्या चांदण्याला काय सांगू?’ असा आर्त सवाल करणाऱ्या आशाताई आज वयाच्या ८२व्या वर्षी, सहस्त्रचंद्रदर्शानंतरही तितक्याच तरुण आवाजात पुन्हा सुरेश भटांच्या गझला घेऊन रसिकांसमोर येत आहेत. ‘८२’ असंच या ध्वनिफितीचं नाव असून सुरेश भटांच्या आशयघन, आर्त, घनव्याकूळ गझलांना पॉपच्या झिंगबाज आवरणात लपेटून मंदार आगाशे या तरुण संगीतकाराने ही ध्वनिफीत सजवली आहे.

सुरेश भटांच्या सिद्धहस्त, ओघवत्या लेखणीतून उतरलेल्या सहा गझलांचा या ध्वनिफितीत समावेश आहे. ओठ, आसवांचे, बरसून, हा असा चंद्र, तोरण आणि दिवस हे जाती कसे या सुरेश भटांच्या सहा गजला या ध्वनिफितीसाठी निवडण्यात आल्या आहेत. मंदार आगाशे या तरुण संगीतकाराने या गझलांना आपल्या संगीताने सजवलं आहे.

यासंदर्भात आशाताई म्हणाल्या, “सुरेश भट यांच्याशी अनेक वर्षं माझे जिव्हाळ्याचे संबंध होते. त्यांच्याविषयीच्या असंख्य आठवणी आहेत. या ध्वनिफितीच्या निमित्ताने त्या आठवणी पुन्हा जाग्या झाल्या. सुरेश भट यांच्या शब्दांची ताकद काय आहे, हे मी वेगळं सांगण्याची आवश्यकता नाही. या ध्वनिफितीच्या निमित्ताने ती ताकद पुन्हा अनुभवता आली. मंदारच्या संगीताची जी पॉप,रॉक शैली आहे, त्या शैलीत माझ्या आवाजात आपल्या गझला रेकाॅर्ड व्हाव्यात, अशी भट साहेबांची खूप इच्छा होती. आज ती इच्छा पूर्ण होत असल्याचा आनंद असला तरी भट साहेब या गझला ऐकायला आपल्यात हवे होते.”

यासंदर्भात मंदार म्हणाला, “१९९४ साली प्रथम सुरेश भट यांना भेटलो तेव्हापासूनच माझ्या इंग्लिश पॉप संगीताच्या शैलीत आणि आशाताईंच्या आवाजात सुरेश काकांच्या गझलांची ध्वनिफीत करावी, अशी त्यांचीच इच्छा होती. आज सुरेश काका हयात नाहीत, पण त्यांचं हे स्वप्न पूर्ण होत असल्याचा आनंद अवर्णनीय आहे. हया अल्बम चे म्युझिक अॅरेंजमेंट डेरेक ज्यूलियन आणि ड्रमचे अरेंजींग पर्कशनिस्ट रवी वेदांत यांनी केले आहे, तसेच या ध्वनिफितीसाठी मेंटरींग धनश्री गणात्रा यांनी केले आहे.

पं. हृदयनाथ मंगेशकर यांच्या ‘हे गीत जीवनाचे’ या चित्रपटातील ‘खुळ्या खुळ्या रे पावसा’ हे मंदारचं पहिलं गाणं. पंडितजींनी स्वत: बोलावून मंदारला हे गाणं करण्यास सांगितलं होतं. त्यानंतर त्याने १९९६ मध्ये प्रथमच सुरेश भट यांच्या गझलांचा समावेश असलेल्या ‘अचानक’ या ध्वनिफितीची निर्मिती केली होती.

‘८२’ या ध्वनिफितीच्या निमित्ताने www.82pop.in या संकेतस्थळाची निर्मितीही करण्यात आली असून त्यावर एका स्पर्धेचं आयोजन करण्यात आलं आहे. ८२ या ध्वनिफितीतील गाण्यांवर चाहत्यांनी जमेल तसे व्हिडिओ करून या संकेतस्थळावर अपलोड करायचे आहेत. आशाताई स्वत: त्यांना आवडलेल्या व्हिडिओंची निवड करून त्यानंतर व्यावसायिक पद्धतीने अंतिम म्युझिक व्हिडिओ तयार करण्यात येणार आहे.